मध्य टेक्सास, अमेरिका | सिधाकुरा अनलाइन – अमेरिकाको टेक्सास राज्यमा आएको विनाशकारी बाढीमा परी हालसम्म ४३ जनाको ज्यान गएको पुष्टि भएको छ। मृत्यु हुनेमध्ये १५ जना बालबालिका रहेका छन् भने २७ बालिका अझै बेपत्ता छन्।

बाढीको सबैभन्दा ठूलो प्रभाव ग्वाडालुपे नदी किनारमा रहेको ‘क्याम्प मिस्टिक’ नामक क्रिश्चियन बालिका ग्रीष्मकालीन शिविरमा परेको छ। करिब ७५० बालिका सहभागी रहेको उक्त शिविरमा ठूलो संख्यामा बालबालिका हराएका छन्। क्याम्पमा रहेका २७ बालिका अझै सम्पर्कविहीन छन्।

केर काउन्टीका शेरिफ ल्यारी लाइथाका अनुसार, हराइरहेकाहरूको खोजी कार्य जारी रहेको छ र उद्धार टोली नदी किनार क्षेत्रमा खटिएका छन्। “जबसम्म सबै भेटिंदैनन्, उद्धार कार्य रोकिने छैन,” उनले भने।

बाढीपछि केही अभिभावकहरूले सामाजिक सञ्जालमार्फत आफ्ना छोरीहरूको मृत्यु पुष्टि गरिसकेका छन्। अहिलेसम्म ८५० जना भन्दा बढीको उद्धार गरिएको छ।

टेक्सास राज्यका गभर्नर ग्रेग एबटले आपतकालीन अवस्था विस्तार गरिएको घोषणा गरेका छन्। उद्धार र राहत कार्यमा संघीय सरकार, स्थानीय निकाय र सुरक्षाकर्मीहरू एकीकृत रुपमा संलग्न छन्। अमेरिकाका राष्ट्रपति डोनाल्ड ट्रम्पले संघीय सरकारले सम्पूर्ण सहयोग गरिरहेको बताएका छन्।

यसबीच, राष्ट्रिय मौसम सेवा (NWS) ले टेक्सासमा अझै भारी वर्षाको सम्भावना रहेको चेतावनी दिँदै सतर्क रहन आह्वान गरेको छ।

उप–गभर्नर ड्यान प्याट्रिकका अनुसार, बेपत्ता बालिकाहरूको धेरैजसो उमेर १२ वर्षभन्दा कम रहेको छ। शिविरबाट प्राप्त भएका तस्वीरहरूमा हिलोले पुरिएका गद्दा, कम्बल, खेलौना र टेडी बेयरहरू देखिएका छन् — जसले घटनाको भयावहता झल्काउँछ।

टेक्सासको यो बाढी पछिल्ला वर्षहरूकै सबैभन्दा भयावह मानिएको छ, जसले देशभर नै दुःखद प्रतिक्रिया ल्याएको छ।